(UTV | යුරෝපා) – රුසියානු ගුවන් යානා සඳහා පූර්ණ ගුවන් තහනමක් පැණවීමට යුරෝපා සංගමය තීරණය කර තිබෙනවා.
ඒ අනුව රුසියානු හිමිකාරීත්වය දරන – රුසියාව තුළ ලියාපදිංචි හෝ රුසියාව විසින් පාලනය කරනු ලබන ඕනෑම ගුවන් යානයකට යුරෝපා සංගමයට අයත් රටවල සිට ගුවන් ගතවීමට – ගොඩබැස්වීමට හෝ එම ගුවන් කලාප හරහා ගමන් කිරීමට අවසර හිමිවන්නේ නැහැ.
මේ අනුව රුසියානු ගුවන් සමාගම් රැසක් යුරෝපා ගමනාන්ත වෙත සිය ගුවන් ගමන් අත්හිටුවා තිබෙනවා.
මේ අතර අයදුම්පත් යොමු කිරීමකින් තොරව වසර 03 ක උපරිමයකට යටත්වන පරිදි යුක්රේන ජාතිකයන්ට සරණාගත වීසා නිකුත් කිරීමට යුරෝපා සංගමය තීරණය කර තිබෙනවා.
පෝලන්තය – රුමේනියාව – හංගේරියාව – මෝල්දෝවා සහ ස්ලොවේකියාව ඇතුලු රටවල් වෙත මේ වනවිටත් පළාගොස් ඇති සංඛ්‍යාව තුන් ලක්ෂ 68 දහසකට අධිකයි.
යුක්රේනය සහ රුසියාව අතර සාම සාකච්ඡා සඳහා එකගතාවයක් ඇතිවී තිබෙනවා.
යුක්රේන ජනාධිපති කාර්යාලය සඳහන් කලේ කිසිදු පූර්ව කොන්දේසියකින් තොරව දෙපාර්ශවය යුක්රේන – බෙලරුසියා දේශසීමාවේදී මුණගැසීමට තීරණය වී ඇති බවයි.
යුක්රේන ජනාධිපති වොලොඩිමිර් සෙලෙන්ස්කි සහ බෙලරුසියා ජනාධිපති ඇලෙක්සැන්ඩර් ලුකෂෙන්කෝ අතර අද පැවති දුරකථන සංවාදයකින් අනතුරුවයි මෙම තීරණයට එළැඹී ඇත්තේ.
යුක්රේන නියෝජිත පිරිස පැමිණ සාකච්ඡා පවත්වා යළි යුක්රේනයට පැමිණෙන තුරු, බෙලරුසියාව තුළ ස්ථාපිත කර ඇති සියලු යුධ ගුවන් යානා – හෙලිකොප්ටර් සහ මිසයිල ක්‍රියාත්මක නොකරන බවටද බෙලරුසියානු ජනාධිපතිවරයා විසින් පොරොන්දුවක් ලබාදී ඇති බවද විදෙස් වාර්තා සඳහන් කළා.
කෙසේවෙතත් රුසියානු හමුදා සෑම දිශාවකින්ම ශෙල් වෙඩි ප්‍රහාර එල්ල කරමින් සිටින බවයි යුක්රේන ආරක්ෂක අංශ සඳහන් කළේ.
මේ අතර යුක්රේන – රුසියානු අර්බුදය පිළිබඳ සාකච්ඡා කිරීමට ජගත් මහා මණ්ඩලයේ හදිසි රැස්වීමක් අද දිනයේදී කැඳවා තිබෙනවා.
රුසියාව විසින් මේ සඳහා දැඩි විරෝධයක් පළකර ඇතත් එම යෝජනාව සම්මත වී තිබෙනවා.
ගැටුම් වහා නවතා සටන් විරාමයකට යොමුවන ලෙසටයි එමගින් යෝජනා කර ඇත්තේ.
