காஸாவிற்கான அமெரிக்க அதிபர் டொனால்ட் ட்ரம்ப்பின் 20 அம்ச அமைதித் திட்டத்தின் ஒரு பகுதியாக, ரஃபா (Rafah) எல்லைக் கடவையை மட்டுப்படுத்தப்பட்ட அளவில் மீண்டும் திறக்க இஸ்ரேல் ஒப்புக்கொண்டுள்ளதாக அந்நாட்டு பிரதமர் பெஞ்சமின் நெதன்யாகுவின் அலுவலகம் ஞாயிற்றுக்கிழமை (25) இரவு தெரிவித்துள்ளது.
”அதிபர் ட்ரம்ப்பின் 20 அம்சத் திட்டத்தின் ஒரு பகுதியாக, ரஃபா எல்லைக் கடவையை பாதசாரிகள் போக்குவரத்திற்கு மட்டும் அனுமதிக்கும் வகையில், முழுமையான இஸ்ரேலிய ஆய்வு முறைக்கு உட்பட்டு மீண்டும் திறக்க இஸ்ரேல் சம்மதித்துள்ளது.
உயிருடன் இருக்கும் அனைத்து பிணைக் கைதிகளையும் திருப்பி அனுப்புவது மற்றும் உயிரிழந்த பிணைக் கைதிகளின் உடல்களைக் கண்டறிந்து ஒப்படைக்க ஹமாஸ் 100% முயற்சி எடுப்பது ஆகிய நிபந்தனைகளின் அடிப்படையில் இந்த எல்லை திறப்பு அமையும்,” என்று நெதன்யாகுவின் அலுவலகம் ‘X’ சமூக வலைதளத்தில் பதிவிட்டுள்ளது.
இஸ்ரேலிய சிப்பாய் ரான் கிவிலியின் (Ran Gvili) உடலைத் தேடும் பணி நிறைவடைந்தவுடன் இந்த எல்லைக் கடவை திறக்கப்படும் என்றும் அதில் குறிப்பிடப்பட்டுள்ளது.
அக்டோபர் 2023 முதல் காஸா பகுதியில் இஸ்ரேல் மேற்கொண்டு வரும் தாக்குதலில் இதுவரை 71,400-க்கும் அதிகமானோர் (பெரும்பாலும் பெண்கள் மற்றும் குழந்தைகள்) கொல்லப்பட்டுள்ளனர்.
இந்தத் தாக்குதலின் ஒரு பகுதியாக, மே 2024 முதல் ரஃபா எல்லைக் கடவையின் பாலஸ்தீனப் பகுதியை இஸ்ரேல் முழுமையாக மூடியுள்ளது.
சமீபத்திய மாதங்களில், காஸாவில் உள்ள கடைசி இஸ்ரேலிய பிணைக் கைதியின் உடலைத் திருப்பி ஒப்படைப்பதோடு இந்த எல்லை திறப்பை இஸ்ரேல் தொடர்புபடுத்தி வருகிறது.
எகிப்தையும் காஸாவையும் இணைக்கும் ரஃபா எல்லைக் கடவை, அக்டோபர் 10-ஆம் தேதி நடைமுறைக்கு வந்த போர்நிறுத்த ஒப்பந்தத்தின் முதற்கட்டமாக அக்டோபரில் திறக்கப்பட வேண்டியிருந்தது. ஆனால், இஸ்ரேல் அதற்கு இணங்கவில்லை.
போர்நிறுத்தத்தின் முதற்கட்டத்திற்குப் பிறகு, பாலஸ்தீன குழுக்கள் உயிருடன் இருந்த 20 இஸ்ரேலிய பிணைக் கைதிகளையும், உயிரிழந்த 27 பேரின் உடல்களையும் ஒப்படைத்துள்ளன. ரான் கிவிலியின் உடல் இன்னும் ஒப்படைக்கப்படவில்லை.
போர்நிறுத்த ஒப்பந்தம் அமலுக்கு வந்ததிலிருந்து, இஸ்ரேலிய இராணுவம் நூற்றுக்கணக்கான விதிமீறல்களைச் செய்துள்ளதாகவும், அதில் குறைந்தது 484 பாலஸ்தீனியர்கள் கொல்லப்பட்டதுடன் 1,321 பேர் காயமடைந்துள்ளதாகவும் சுகாதார அமைச்சகம் தெரிவித்துள்ளது. (AA)