நாட்டைச் சூழவுள்ள கடற்பிராந்தியத்தில் உருவாகியுள்ள தாழமுக்க வலயம் காரணமாக, மறு அறிவித்தல் வரை மீன்பிடி நடவடிக்கைகளுக்காகக் கடலுக்குச் செல்வதைத் முற்றாகத் தவிர்க்குமாறு, கடற்றொழில் அமைச்சு முழு மீனவ சமூகத்திற்கும் கடுமையாக எச்சரிக்கை விடுக்கின்றது.
இந்த அறிவுறுத்தல், பல நாள் மற்றும் ஒரு நாள் மீன்பிடிக் கலன்கள் உள்ளிட்ட அனைத்து மீன்பிடிப் படகுகளுக்கும் செல்லுபடியாகும்.
வளிமண்டலவியல் திணைக்களத்தின் எதிர்வுகூறலின்படி, இந்த சீரற்ற காலநிலை நிலைமை குறைந்தது நவம்பர் 29 ஆம் திகதி வரை நீடிக்கக்கூடும் எனவும், கடல் அலைகள் 4-5 மீட்டர் வரை உயரக்கூடும் எனவும், காற்றின் வேகம் மணிக்கு 80 கிலோமீட்டர் வரை அதிகரிக்கக்கூடும் எனவும் தெரிவிக்கப்பட்டுள்ளது.
இந்த சீரற்ற காலநிலையின் தீவிரம், இன்று (27) காலை வாழைச்சேனை துறைமுகத்திற்குள் பிரவேசிக்க முற்பட்ட IMUL-0020-TCO எனும் பல நாள் மீன்பிடிக் கலன் கவிழ்ந்து விபத்துக்குள்ளானதன் மூலம் உறுதிப்படுத்தப்பட்டுள்ளது.
இந்த விபத்தில், ஜே.எம். ரிகாஸ் எனும் மீனவர் காணாமல் போயுள்ளதுடன், அவரைத் தேடும் பணி தற்போது முன்னெடுக்கப்பட்டு வருகிறது.
ஒரு விசேட ஊடக சந்திப்பை நடாத்தி, நடைமுறைப்படுத்தப்பட்டுள்ள விரிவான பாதுகாப்பு ஏற்பாடுகள் குறித்து விபரித்த கடற்றொழில் மற்றும் நீரியல் வளங்கள் திணைக்களத்தின் பணிப்பாளர் நாயகம், திரு. சுசந்த கஹவத்த அவர்கள், “இது இலகுவாகக் கருதப்பட வேண்டிய ஒரு விடயமல்ல.
கரையோரத்திற்கு அருகிலுள்ள கடற்பரப்பில்கூட அனைத்து வகையான படகுகளுக்கும் மிகவும் அபாயகரமான நிலைமையே காணப்படுகின்றது.
நாம் அனைத்து மீன்பிடித் துறைமுகங்கள் மற்றும் இறங்குதுறைகளிலிருந்து படகுகள் புறப்படுவதைத் தடை செய்துள்ளோம்.
மீனவர்களின் பாதுகாப்பை உறுதி செய்வதே எமது பிரதான இலக்காகும்,” எனத் தெரிவித்தார்.
அமைச்சினால் பின்வரும் தீர்க்கமான அறிவுறுத்தல்கள் வெளியிடப்பட்டுள்ளன:
- ஆழ்கடல் படகுகள்: தற்போது ஆழ்கடலில், குறிப்பாக சூறாவளி உருவாகக்கூடிய நாட்டின் கிழக்குக் கடற்பரப்பில் உள்ள படகுகள், உடனடியாக அருகிலுள்ள பாதுகாப்பான இடங்களுக்குச் செல்லுமாறு கடுமையாக அறிவுறுத்தப்படுகின்றன.
- கரையோரப் படகுகள்: கரையோரத்தில் நிறுத்தப்பட்டுள்ள சிறிய படகுகளை, பெரும் அலைகள் மற்றும் உயர் அலைகளிலிருந்து பாதுகாப்பதற்காக, இயன்றளவு தரைப்பகுதியை நோக்கிக் கொண்டு செல்லுமாறு கோரப்படுகின்றது.
- துறைமுகங்களின் பாதுகாப்பு: காலி, மாத்தறை, தங்காலை போன்ற அதிக நெரிசல் மிக்க துறைமுகங்களில் நங்கூரமிடப்பட்டுள்ள பல நாள் படகுகள், ஒன்றுடன் ஒன்று மோதுவதால் ஏற்படும் சேதங்களைத் தவிர்ப்பதற்காக, பழைய டயர்கள் போன்ற பாதுகாப்பு உபாயங்களைப் பயன்படுத்துமாறு கோரப்படுகின்றனர். காலி மீன்பிடித் துறைமுகத்தில் உள்ள சில படகுகள் ஏற்கனவே வர்த்தகத் துறைமுகத்திற்குப் பாதுகாப்பிற்காக நகர்த்தப்பட்டுள்ளன.
கடற்றொழில் அமைச்சின் செயலாளர், கலாநிதி பி.கே. கோலித கமல் ஜினதாச அவர்கள், மாவட்ட அலுவலகர்கள்/உதவிப் பணிப்பாளர்கள் மற்றும் துறைமுக முகாமையாளர்கள் உள்ளிட்ட அனைத்து அமைச்சு அதிகாரிகளும் தயார் நிலையில் உள்ளதாகத் உறுதிப்படுத்தினார்.
“நாம் அனர்த்த முகாமைத்துவ நிலையம் மற்றும் வளிமண்டலவியல் அதிகாரிகளுடன் தொடர்ச்சியான தொடர்பில் உள்ளோம்.
எமது இலக்கு, எந்தவிதமான பாதிப்புகளும் இன்றி இந்த நிலைமையைக் கையாள்வதாகும்,” என அவர் குறிப்பிட்டார்.
இந்தக் காலப்பகுதியில் மீன்களுக்குக் கிடைக்கக்கூடிய உயர் விலையை எதிர்பார்த்து, தமது உயிரைப் பணயம் வைக்க வேண்டாம் என மீனவ சமூகத்திடம் கோரும் அமைச்சு, எந்தவொரு அவசர நிலைமையிலும் அனர்த்த முகாமைத்துவ நிலையத்தின் அவசர அழைப்பு இலக்கமான 117ஐ அல்லது தமது பிரதேசத்தில் உள்ள கடற்றொழில் அலுவலகத்தைத் தொடர்புகொள்ளுமாறு அறிவிக்கின்றது.